Grein í Morgunblaðinu í dag
Nú liggur fyrir afar vönduð skýrsla Rannsóknarnefndar Alþingis. Ekki eitt einasta andartak flögrar að mér að verja neitt það sem í skýrslunni stendur þrátt fyrir að Framsóknarflokkurinn hafi verið í ríkisstjórn á árabilinu 1995 - 2007.
Skýrslan er sá grunnur sem við verðum að nota sem stökkpall til bættrar framtíðar,fortíðinni breytum við ekki, en á nútíðina og framtíðina getum við haft áhrif. Það er skilda mín sem þingmanns að vinna heilt fyrir þjóðina og eiga þátt í að taka ákvarðanir sem leiða af sér farsæld og bætta framtíð fyrir íslendinga sem kjörinn fulltrúi þjóðarinnar. Ég hvet stjórnvöld að leggja aukinn kraft og fjármagn til rannsóknaraðila og dómstóla því þjóðin þarf á því að halda að þessi mál verða afgreidd hratt og af fagmennsku.
Við sjáum nú hvaða afleiðingar það hefur að ríki afsali sér löggjafavaldi eins og gert var með EES samningnum. Megin uppistaða EES samningsins er hið svokallaða fjórfrelsi, sem gengur út á frjálsan flutnings vöru, fólks, þjónustu og fjármagns án landamæra innan Evrópusambandsins. Þarna var lagður grunnur að því geðræðislega og taumlausa fjármálakerfi sem þróaðist hér og í Evrópu sem varð okkur að lokum að falli.
Það leiðir hugann að því hvers vegna Alþingi var ekki styrkt faglega og fjárhagslega í kjölfarið af gildistöku samningsins til að löggjafinn myndi hafa þol og styrk til að takast á við breytt umhverfi lagasetningar. Hví er Alþingi og löggjafavaldið ekki varið betur? Ég er þess fullviss að óvönduð lagasetning undanfarinna ára á hlut í því hruni sem við stöndum frammi fyrir.
Eftir að ég tók sæti á Alþingi hef ég komist að raun um að innviðir Alþingis sem stofnunar eru fúnir. Það er með ólíkindum hvað vantar upp á faglega lagasetningu og nefndarsvið Alþingis er ekki að skila því starfi sem ætlast er til sem ráðgjafandi aðili við lagasetningu. Í krafti meirihlutastjórna fara frumvörp í gegnum þingið og verða að lögum sem vitað er fyrirfram að standast ekki stjórnarskrá, alþjóðasamninga og eru á gráu svæði gagnvart gildandi lögum. Dómsmál undanfarinna ára sanna það og samanburður við Norðurlöndin varðandi þessi mál er sláandi okkur í óhag.
Ég hef spurt mig hví löggjafinn sé ekki varinn af starfi lagaprófessora sem hafa fasta stöðu við þingið. Hví er ekki starfandi lagaráð eða lagaskrifstofa sem hefur það hlutverk að lesa yfir lagafrumvörp og þingsályktunartillögur? Við verðum að hafa kjark og þor til að horfast í augu við vandamálin og viðurkenna brotalamir stjórnkerfisins, stjórnmálaflokkana og stjórnsýslunnar allrar.
Fyrsta skrefið í þessa átt er frumvarp um lagaskrifstofu Alþingis, sem ég hef lagt fram ásamt flestum þingmönnum Framsóknarflokksins og Hreyfingarinnar, sem hefur þetta hlutverk. Að mínu mati er það þó ekki nóg, því nú er komið að þeim tímapunkti, að leita til sérfræðinga þjóðþinga hinna Norðurlandanna, til að endurskipuleggja faglega stöðu Alþingis Íslendinga.
