Grein í Morgunblaðinu í dag
Hverjum hefði dottið í hug að Vinstri grænir undir forystu Steingríms J. Sigfússonar, myndi slá lán hjá „spúandi stóriðju“ á Íslandi. Því skaut skökku við að Steingrímur náttúruverndarsinni lagði fram frumvarp á Alþingi seint á síðasta ári um lántöku ríkisins frá höfuðóvinum Vinstri grænna sjálfri stóriðjunni.
Í framhaldinu eða þann 22. desember voru síðan samþykkt lög um tímabundna breytingu á heimildarlögum um stóriðju vegna skattgreiðslna á árunum 2010, 2011 og 2012. Með lögunum var veitt heimild til að gera viðauka við aðalsamninga eða fjárfestingarsamninga við járnblendiverksmiðjuna í Hvalfirði, álverið á Grundartanga, álverið í Reyðarfirði og álverið í Straumsvík um fyrirframgreiðslu upp í álagningu á tekjuskatti og öðrum opinberum gjöldum á næstu þremur árum upp á 3,6 milljarða.
Hvað þýðir þetta í raun? Jú fjármálaráðherra hefur ákveðið að stóriðjufyrirtækin skuli greiða í þremur jöfnum greiðslum á árunum 2010, 2011 og 2012 upp í væntanlega álagningu á tekjuskatti og öðrum opinberum gjöldum á árunum 2013–2018. Í greinargerð með frumvarpinu segir orðrétt: „...vegna mikils samdráttar í efnahagslífinu og erfiðrar stöðu ríkissjóðs í kjölfar hans hefur það orðið að samkomulagi við nokkra af stærstu notendum raforku í landinu að þeir greiði fyrir fram árlega samtals kr. 1.200 milljónir á árunum 2010, 2011 og 2012 upp í væntanlega álagningu opinberra gjalda á árunum 2013–2018.
Eðlilega fær ríkissjóður því engan tekjuskatt af þessum fyrirtækjum 2013 – 2018, með öðrum orðum þá er verið að taka lán í framtíðartekjum ríkissjóðs.
Kunnugleg aðferð frá Grikklandi?
Fyrirframgreiðslan skiptist milli aðila í hlutfalli við raforkunotkun þeirra. Hlutfallsleg raforkunotkun ISAL er 22,73% í hlutfalli af þeim félögum sem lögin ná til. Í fyrirframgreiðslu samkvæmt ákvæði þessu skal ISAL því, á árunum 2010, 2011 og 2012, greiða 22,73% af 1.200 m.kr. eða 272.760.000 kr. á hverju ári. Hlutfallsleg notkun járnblendiverksmiðjunnar í Hvalfirði er 6,8% og skal félagið greiða 6,8% af 1.200 m.kr. eða 81.600.000 kr. á sama árabili. Hlutfallsleg notkun Norðuráls á Grundartanga er 32,36% og skal greiða það hlutfall af 1.200 m.kr. eða 388.320.000 kr. og loks er hlutfallslega notkun álversins á Reyðarfirði 38,11% og skal greiða það hlutfall af 1.200 m.kr. eða 457.320.000 kr. á árunum 2010, 2011og 2012. 1,2 milljarðar á ári, 3,6 milljarðar á 3 árum.
Enn á ný kemur Steingrímur J Sigfússon fram með frestunartillögur fyrir yl í ríkisstjórn. Með þessum gjörningi fara Vinstri grænir, sem einokað hafa umhverfismál, í fararbroddi að festa stóriðjuna hér um ókomin ár. Með þessu hagsmunir stóriðjunnar orðnir svo samofnir íslenskum hagsmunum að líkja má því við fangelsun íslenska ríkisins. Kunnuglegt frá Argentínu og líklega allt gert að uppskrift AGS.
Svo er það síðasti naglinn í kistuna í lögum þessum. Íslenska ríkinu ber að endurgreiða eftirstöðvar af fyrirframgreiðslunni að lokinni álagningu árið 2018, í samræmi við almennar reglur um meðferð ofgreiddra skatta. Stóriðjan hefur engan hvata til að skila hagnaði 2013-2018,heldur þvert á móti, því í vændum er endurgreiðsla upp á fleiri milljarða með vöxtum frá íslenska ríkinu.
Er hægt að kalla þetta annað en „tæra snilld“ fjármálaráðherra.
